Y Prif Swyddog Gweithredol

Mae gan gyfarwyddiaeth y Prif Swyddog Gweithredol gyfrifoldeb am:

• Adnoddau Dynol;
• Cyllid;
• Technoleg Gwybodaeth a Chyfathrebu;
• Rheoli Ystadau a Chyfleusterau;
• Diogelwch;
• Cynllunio Corfforaethol;
• Rheoli Newid a Rhaglenni
• Cyfathrebu Allanol.

Adnoddau Dynol

Ffocws y tîm Adnoddau Dynol yw cynorthwyo’r rheolwyr a’r staff i wneud y Cynulliad yn lle gwych i weithio. Er mwyn cyflawni hyn, rydym yn gweithio gyda’n cwsmeriaid i feithrin yr arferion pobl gorau posibl, a hynny o’r broses recriwtio, i’r cyfnod sefydlu, dysgu a datblygu, rheoli perfformiad, cynorthwyo rheolwyr llinell, systemau TG adnoddau dynol, iechyd corfforaethol hyd at ddarparu cymorth cyn ymddeol. Mae Strategaeth Pobl y Cynulliad yn nodi ein hamcanion strategol a chaiff ei chynnal gan gynllun gwasanaeth manylach. Caiff ei hadolygu a’i diweddaru yn flynyddol mewn cydweithrediad â’n cwsmeriaid. Un elfen bwysig o’r gwaith yw goruchwylio’r cymorth ariannol a roddir i Aelodau’r Cynulliad a’u cynorthwyo yn eu gwaith fel cyflogwyr.

Y Gwasanaethau Ariannol

Mae tîm y Gwasanaethau Ariannol yn pennu’r safonau ar gyfer rheolaeth ariannol, cyfrifyddu a rheoli cyllid yn y Cynulliad; prosesu taliadau (gan gynnwys cyflogau) i Aelodau’r Cynulliad, eu staff cymorth a staff y Cynulliad; cynorthwyo Comisiwn y Cynulliad i ddangos gwerth am arian, trefn a chywirdeb wrth reoli ei adnoddau ariannol; a thalu anfonebau ei holl gyflenwyr cyn gynted â phosibl er mwyn hwyluso llif arian busnesau yn ystod y cyfnod anodd hwn.

Technoleg Gwybodaeth a Chyfathrebu

Mae’r tîm TGCh yn gyfrifol am reoli’r gwasanaethau TGCh a darlledu a ddarperir i Gomisiwn y Cynulliad. Mae’r tîm yn sicrhau y caiff gwasanaethau TGCh eu darparu i Aelodau, eu staff cymorth a swyddogion, a bod cyfleusterau darlledu ar gael o fewn Comisiwn y Cynulliad.

Rheoli Ystadau a Chyfleusterau

Mae’r tîm yn gyfrifol am reoli ystad Comisiwn y Cynulliad a rheoli cyfres o gontractau gyda darparwyr gwasanaeth allanol. Mae’r tîm yn darparu amrywiaeth eang o wasanaethau a chyfleusterau hanfodol ar gyfer adeilad y Cynulliad ac Adeilad y Lanfa i alluogi a chynorthwyo Aelodau’r Cynulliad a swyddogion i wneud eu gwaith yn effeithiol. Mae’r rhain yn cynnwys gweithdrefnau brys, adeiladau ac iechyd a diogelwch.

Diogelwch

Mae’r adran Ddiogelwch yn gyfrifol am ddelio â phob agwedd ar ddiogelwch adeiladau a diogelwch cyffredinol yn adeiladau Comisiwn y Cynulliad ym Mae Caerdydd.  

Cynllunio Corfforaethol

Cyfrifoldeb y tîm Cynllunio Corfforaethol yw amlinellu a monitro blaenoriaethau ac amcanion Comisiwn y Cynulliad, yn cynnwys paratoi Cynllun Corfforaethol Staff Comisiwn y Cynulliad a Chynlluniau Blynyddol, Rheoli Risg a Pharhad Busnes.

Rheoli Newid a Rhaglenni

Swyddogaeth y tîm Rheoli Newid a Rhaglenni yw darparu fframwaith i helpu i reoli, cyflawni a gweithredu newidiadau o fewn y sefydliad. Mae’r tîm yn sicrhau bod technegau Rheoli Rhaglenni a Phrosiectau da a dogfennaeth yn cael eu defnyddio i ymdrin â darnau o waith o fewn amser penodol.

Cyfathrebu Allanol

Mae’r tîm Cyfathrebu Allanol yn gyfrifol am godi ymwybyddiaeth y cyhoedd o bwerau a gwaith Cynulliad Cenedlaethol Cymru. Mae ei swyddogaethau yn cynnwys cyflwyno strategaeth gyfathrebu, cysylltu â’r Wasg a’r cyfryngau darlledu ar ran y Llywydd, Comisiwn y Cynulliad a Chadeiryddion Pwyllgorau, yn ogystal ag ar ran y Prif Weithredwr a Chlerc.