Deddfwriaeth

Cafodd pwerau deddfu newydd eu rhoi i Gynulliad Cenedlaethol Cymru ar ddechrau’r Trydydd Cynulliad ym mis Mai 2007. Darparwyd ar gyfer y pwerau newydd hyn yn Neddf Llywodraeth Cymru 2006, sy’n galluogi’r Cynulliad i basio deddfwriaeth, a elwir yn Fesurau’r Cynulliad, yn y meysydd y mae ganddo gymhwysedd deddfwriaethol.

Mae’r wybodaeth ddiweddaraf am ddeddfwriaeth bresennol yn y Cynulliad ar gael yn Cynnydd Gorchmynion Cymhwysedd Deddfwriaethol a Mesurau Cynulliad.

Cymhwysedd deddfwriaethol y Cynulliad

Mae’r meysydd y mae gan y Cynulliad gymhwysedd deddfwriaethol ynddynt ar hyn o bryd wedi’u nodi yn Atodlen 5 i Ddeddf Llywodraeth Cymru 2006.Gellir gweld cyfres o Nodiadau Tracio Pwerau’r Cynulliad sy’n dangos graddau cymhwysedd deddfwriaethol y Cynulliad a thracio ychwanegiadau (rhai a gymeradwywyd ac ychwanegiadau a gynigir) at Atodlen 5 yma: Nodiadau Tracio Pwerau'r Cynulliad.

Is-ddeddfwriaeth

Mae gan y Cynulliad hefyd y swyddogaeth o graffu ar Is-ddeddfwriaeth a wnaed gan Weinidogion Cymru. Mae is-ddeddfwriaeth yn atodol i Fesurau’r Cynulliad neu Ddeddfau Senedd y Deyrnas Unedig a gall gynnwys gorchmynion, rheoliadau, cynlluniau yn ogystal â chanllawiau statudol a gorchmynion lleol.