Y Pwyllgor Cyllid

Ymchwiliad i Ddyrannu Cronfeydd Cyfalaf yng Nghymru

Cylch gorchwyl

Ystyried y ffordd y caiff cronfeydd cyfalaf eu dyrannu gan Lywodraeth Cynulliad Cymru, gan ystyried yr angen am y pwyntiau a ganlyn:

• sicrhau bod adnoddau’n cael eu defnyddio’n effeithlon ac effeithiol i gyflawni amcanion datganedig y Llywodraeth;

• cydbwyso blaenoriaethau gwleidyddol cystadleuol o fewn adrannau a rhwng adrannau;

• cadw ymrwymiadau blaenorol a chyfredol mewn cof;

• gallu ymateb yn hyblyg i flaenoriaethau gwleidyddol cyfnewidiol neu flaenoriaethau eraill;

Bydd yr ymchwiliad yn canolbwyntio’n benodol ar y pwyntiau a ganlyn:

• i ba raddau y caiff y rhaglen gwariant cyfalaf ei rheoli a’i chydlynu’n strategol;

• sut y caiff prosiectau eu hasesu cyn eu cymeradwyo; sut y caiff cynnydd ei fonitro a sut y caiff y gyllideb a gwariant eu rheoli yn ystod y flwyddyn.

Bydd yr ymchwiliad hefyd yn bwrw golwg dros y pwyntiau a ganlyn, fel y bo’n briodol:

• sut caiff cymalau cymdeithasol eu gweithredu mewn caffael cyfalaf;

• sut mae cytundebau fframwaith yn datblygu;

• pa gyfleoedd sydd i hyrwyddo busnesau yng Nghymru o fewn y rhaglen gyfalaf;

• pa ddylanwad posibl sydd mewn rhaglenni cyfalaf.

Ar y cyfan, mae buddsoddiad cyfalaf yn ymrwymiad hirdymor ac, yn aml iawn, dim ond yn y tymor canolig a’r hirdymor y gellir gwerthuso ei effeithiolrwydd. Bydd yr ymchwiliad yn canolbwyntio’n eang ar y prosesau o ddyrannu a rheoli gwariant cyfalaf, ac ni fydd yn cynnwys asesu rhinweddau, na’r dulliau o weithio ar gyfer prosiectau unigol.