Y Pwyllgor Iechyd, Lles a Llywodraeth Leol

Ymchwiliad i Fyrddau Lleol Diogelu Plant yng Nghymru

Mae’r Pwyllgor wedi cytuno i gynnal ymchwiliad i weld a yw Byrddau Lleol Diogelu Plant yn perfformio’n effeithiol ac yn gyson ledled Cymru o ran cryfhau trefniadau ar gyfer gwarchod a hybu lles plant.

Cylch gorchwyl

Ymchwiliad i weld a yw Byrddau Lleol Diogelu Plant yn perfformio’n effeithiol ac yn gyson ledled Cymru o ran cryfhau trefniadau ar gyfer gwarchod a hybu lles plant, gan ganolbwyntio ar:

• ba mor briodol yw polisi a chanllawiau cyfredol Llywodraeth Cymru mewn perthynas â Byrddau Lleol Diogelu Plant;

• pa mor briodol yw cwmpas a ffocws cyfrifoldebau Byrddau Lleol Diogelu Plant;

• aelodaeth o Fyrddau Lleol Diogelu Plant o ran rôl partneriaethau statudol a hefyd y sector gwirfoddol a sefydliadau llai / arbenigol;

• trefniadau ar gyfer ariannu Byrddau Lleol Diogelu Plant;

• perthynas Byrddau Lleol Diogelu Plant â phartneriaethau lleol eraill, gan gynnwys Partneriaethau Plant a Phobl Ifanc; Partneriaethau Diogelwch Cymunedol; Byrddau Gwasanaeth Lleol; y Timau Integredig Cymorth i Deuluoedd arfaethedig.

• effeithiolrwydd y Byrddau Lleol Diogelu Plant o ran hybu lles a’r gwaith o warchod grwpiau penodol o blant sy’n agored i niwed, fel plant ag anableddau, plant sy’n geiswyr lloches, plant sydd wedi cael eu masnachu a phlant o grwpiau pobl dduon a lleiafrifoedd ethnig;

• effeithiolrwydd Byrddau Lleol Diogelu Plant yn eu rôl benodol o ran hybu dyletswyddau a chyfrifoldebau rhannu gwybodaeth asiantaethau partner Byrddau Lleol Diogelu Plant;

• effeithiolrwydd Byrddau Lleol Diogelu Plant o ran cynnwys plant a phobl ifanc yn eu gwaith.