Ganed Nerys Evans yn Llangain, ger Caerfyrddin ym 1980. Bu’n fyfyrwraig ym Mhrifysgol Manceinion lle cafodd radd mewn Theori Llywodraethol a Gwleidyddol. Hefyd, enillodd radd Meistr wedi iddi astudio Gwleidyddiaeth Cymru ym Mhrifysgol Caerdydd.

Bu Nerys yn gweithio fel swyddog gwleidyddol i Blaid Cymru yn y Cynulliad Cenedlaethol am bron i bedair blynedd yn ystod yr ail Gynulliad. Roedd yn gyfrifol am y portffolios addysg a dysgu gydol oes, diwylliant, y Gymraeg a chwaraeon, a'r cyfansoddiad. Mae Nerys hefyd wedi gweithio fel trefnydd i Blaid Cymru yn Nwyrain Caerfyrddin a Dinefwr a swyddog y wasg i grwp Plaid Cymru yng Nghyngor Sir Caerfyrddin.

Mae diddordebau gwleidyddol Nerys yn cynnwys materion gwledig, difaterwch ymhlith pleidleiswyr, a’r Gymraeg. Mae hefyd wedi bod yn gynrychiolydd a threfnydd gweithgar gydag undeb PCS.